Greinasafn fyrir flokkinn: Bloggið

Fréttatilkynning frá Keðjuverkun

Borist hefur eftirfarandi fréttatilkynning:

Reiðhjólaunnendur nær og fjær.

Keðjuverkun stefnir á að opna hjólanýtinguna yfir sumarmánuðina á nýjum stað í hjarta borgarinnar. Fyrir ykkur sem ekki vita þá er Keðjuverkun svokallað kollektív sem var stofnað í fyrrasumar. Meira um Keðjuverkun hér:

http://kedjuverkun.org/info/

Við björgum hjólum sem eru á haugunum eða á leiðinni þangað og breytum þeim í einföld götuhjól eða gerum þau upp. Síðasta sumar fór fjöldi hjóla frá Keðjuverkun aftur á götuna sem annars hefðu lent í hjóla-grafreitnum, Eldhús Fólksins eldaði mat, hljómsveitir héldu tónleika og gestir lásu róttækar bókmenntir á Andspyrnu bókasafninu.

Staðurinn sem Keðjuverkun er að skoða er með stóran bakgarð og lítið rými innandyra. Staðurinn er í alfaraleið og mjög sýnilegur frá göngugötum miðbæjarins og því gæti orðið mikil traffík í gegnum hjólanýtinguna. Við lærðum mikið af síðasta sumri, allt sem vel var gert og það sem betur má fara, og hefst því endurskipulagning á kollektívinu í heild sinni.

Afhverju þurfum við hjóla kollektív?

  • Það er hægt að búa bíllaus á höfuðborgarsvæðinu og nota almenningssamgöngur aðeins að hluta til. Við sem róttæk hreyfing getum haft áhrif á hvernig þessu er háttað.
  • Það er sjálfhvetjandi að setja saman sitt eigið hjól frá grunni og hvergi er sameiginleg aðstaða til að gera það á Íslandi (að okkur vitandi).
  • Getur verið að þú þurfir ekki 100 þúsund króna tuttugu og eins gíra fjallahjól með dempurum og vökvastýri til að hjóla? Kannski er einfalt og ódýrt eins gíra hjól nóg sem bilar nánast aldrei? Gangi þér vel að finna það í hjólaverslunum.
  • Heill haugur af fjallahjólum enda í ruslinu á hverjum degi og við erum að sækja þau. Þau þurfa smávægislagfæringu til að komast aftur á götuna eða með því að breyta þeim í einföld eins gíra hjól sem virka.
  • Hjólaviðgerðar-stereotípuna þarf að útrýma. Það er ekki nauðsynlegt að vera gagnkynhneigður né með getnaðarlim til að læra hjólaviðgerðir.

Hér eru dæmi um hvað við gerum sem hjóla-kollektív

  • Tökum við hjólum sem annars færu í ruslið og strípum þau. Hjólapartar eru flokkaðir á sinn stað.
  • Aðstoða fólk við að gera við sín eigin hjól og að nota varahluta-lagerinn til að skipta út biluðum pörtum
  • Halda úti ákveðnum fjölda hjóla til útláns til gesta sem vilja fá hjól lánað yfir daginn gegn frjálsum framlögum.
  • Dreifa flyerum og hengja upp póstera
  • Skipuleggja tónleika í garðinum, Critical Mass hjólaferðir og annað sem áhugi er fyrir.
  • Að kynna og viðhalda leiðtogalausu umhverfi þar sem rödd allra hefur hljómgrunn.

Þú þarft ekki að vera sjófær í hjólaviðgerðum til að vera hluti af verkefninu. Áhugi er það eina sem þarf.

Við munum halda fund á Kaffi Rót í Hafnarstræti 17 á þriðjudaginn klukkan 19:00.

Sendið okkur póst á info@kedjuverkun.org ef komið á fundinn.

Keðjuverkun – Hjólanýting

www.kedjuverkun.org

 

Bogotá Change

Á kvikmyndahátíðinni Reykjavík Shorts & Docs sem nú stendur yfir í Bíó Paradís er meðal annars sýnd heimildarmyndin Bogotá Change eftir Andreas Dalsgaard.

Myndin er „áhugaverð saga um tvo borgarstjóra í Bogotá, Antanas Mockus og Enrique Peñalosa, sem eru báðir gæddir miklum persónutöfrum hvor á sinn hátt. Á innan við 10 árum breyttu óhefðbundnar og skapandi aðferðir þeirra einni hættulegustu og spilltustu borg heims í friðsama fyrirmyndarborg.“

Kvikmyndin verður sýnd í kvöld, mánudagskvöldið 31. janúar kl. 18:00. Hér má sjá brot úr myndinni.

Aðalfundur 2010

 

Aðalfundur samtaka um bíllausan lífsstíl verður haldinn í Útgerðinni, Grandagarði 16, Reykjavík, þriðjudaginn 26. október næstkomandi. Á dagskrá eru venjubundin aðalfundarstörf. Hans Heiðar Tryggvason, verkefnastjóri hjá umhverfis- og samgöngusviði Reykjavíkurborgar mun halda erindi. Hans var meðal þeirra sem stýrðu tilrauninni með hjólastíginn á Hverfisgötu og lokunum í miðbænum í sumar. Hann mun ræða þessi verkefni stuttlega.

Magnús Jensson formaður samtakanna mun einnig halda stutt erindi. Allir velkomnir.

Skv. lögum samtakanna verða tekin fyrir eftirfarandi mál:

1. Ársskýrsla um störf stjórnar

(2. Endurskoðaðir reikningar félagsins lagðir fram)

3. Kosningar til stjórnar

4. Lagabreytingar

5. Önnur mál

Á aðalfundinum verður m.a. kosið í stjórn samtakanna. Eftirfarandi stöður eru auglýstar: Formaður, ritari, gjaldkeri, tveir meðstjórnendur og tveir varamenn.

Þeir sem hyggja á framboð láti vinsamlega vita af sér á netfangið billaus hjá billaus.is

 

Vel heppnað málþing

Þann 19. júní síðastliðinn endurgerðu Samtök um bíllausan lífsstíl fræga myndaseríu frá borginni Münster í Þýskalandi. Af því tilefni stóðu samtökin fyrir velheppnuðu málþingi síðastliðinn föstudag þar sem myndirnar voru frumsýndar. Jón Gnarr borgarstjóri flutti ávarp og svo fluttu erindi Svandís Svavarsdóttir, Gíslim Marteinn Baldursson, Sigrún Helga Lund, Bergur Ebbi Benediktsson og Ólafur Mathiesen.

Hér að ofan má sjá myndaseríuna. Á málþinginu var einnig sýnt stutt myndskeið um framkvæmdina, það má sjá hér.

Myndum borg – málþing

Hvernig myndi Reykjavík líta út ef fleiri hjóluðu? Eða tækju strætó? Samtök um Bíllausan lífsstíl endurgerðu þann 19. júní fræga myndaseríu frá borginni Münster í Þýskalandi þar sem í forgrunni standa 70 manns, en að baki þeim þrír mismunandi ferðamátar, þ.e. 60 bílar, 70 hjól og einn strætó.

Nú á samgönguviku verða myndirnar frumsýndar og af því tilefni stendur Bíllaus lífsstíll fyrir málþingi í Hafnarhúsinu, föstudaginn 17. september frá klukkan 15:00 til 17:00, sem ber titilinn Myndum borg.

Fyrirlesarar verða Jón Gnarr borgarstjóri, Svandís Svavarsdóttir umhverfisráðherra, Gísli Marteinn Baldursson, Sigrún Helga Lund, Páll Hjaltason, Bergur Ebbi Benediktsson og Ólafur Mathiesen. Einnig verður sýnt stutt myndskeið um framkvæmd tilraunarinnar.

Við vonumst til að sjá ykkur sem flest, málþingið er öllum opið og aðgangur ókeypis.

Hjólreiðastígur á Hverfisgötu

Starfsmenn Reykjavíkurborgar vinna nú að uppsetningu tímabundins hjólreiðastígs á Hverfisgötu. Þessi hjólreiðastígur er hluti hjólreiðastígs sem á að ná frá Laugardalnum niður í bæ eins og sjá má á þessu korti.

Framkvæmdin er sérstaklega velkomin núna þar sem afar erfitt er að komast af göngustígnum við Sæbraut inn í Lækjargötu vegna framkvæmdanna við tónlistarhúsið.

Tilkynningu Umhverfis- og samgöngusvið má sjá hér.

Myndum borg!

Laugardaginn 19. júníætla áhugamenn um borgarlíf ásamt Samtökum um bíllausan lífsstíl að endurtaka tilraunina frá Münster og standa fyrir hópmyndatöku á Melhaga í vesturbæ Reykjavíkur. Myndatakan hefst klukkan 13:00og verða teknar myndir af götunni með 60 bílum, 60 reiðhjólum og 60 manns í strætó og 60 gangandi vegfarendum.

Við þurfum sjálfboðaliða og allir eru velkomnir. Það myndi auðvelda okkur mjög vinnuna ef fólk myndi skrá sig, annaðhvort á Facebook-síðu viðburðarins og/eða með því að senda tölvupóst á myndumborg@gmail.com. Gott er að tiltaka nafn, símanúmer og hvort menn geti komið á bíl eða hjóli.

Þetta er einstakur viðburður sem EKKI verður endurtekinn en öruggt má telja að ljósmyndin og myndbandið sem verður til, eigi eftir að vera notað lengi í umræðunni um borgar- og umhverfismál á Íslandi. Það er því um að gera að taka laugardaginn 19. júní frá!

 

Myndum borg!

Hér að ofan má sjá fræga ljósmyndaröð frá þýsku borginni Münster sem sýnir hversu mikið pláss sextíu manns taka í borgarlandinu ef þeir ferðast á einkabílum, reiðhjólum og í strætó. Münster er um 200 þúsund manna borg í Vesturhluta Þýskalands, og er hún gjarnan kölluð hjólahöfuðborg Þýskalands.

Ljósmyndaserían er gjarnan notuð í umræðum um samgöngu- og skipulagsmál í borgum, því hún sýnir glöggt hversu mikið svæði bílarnir taka á götunum, þar með einnig hve mikið gæti áunnist ef stærri hluti fólks ferðaðist um með öðrum hætti. Slíkt myndi ekki aðeins stuðla að minni hljóð- og loftmengun, og gera göturnar öruggari, heldur einnig gera það að verkum að þeir sem sannarlega vilja og þurfa nota bíl, kæmust greiðar á milli staða.

Laugardaginn 19. júní ætla áhugamenn um borgarlíf ásamt Samtökum um bíllausan lífsstíl að endurtaka tilraunina frá Münster og standa fyrir hópmyndatöku á Melhaga í vesturbæ Reykjavíkur. Myndatakan hefst klukkan 13:00og verða teknar myndir af götunni með 60 bílum, 60 reiðhjólum og 60 manns í strætó og 60 gangandi vegfarendum.

Við þurfum sjálfboðaliða og allir eru velkomnir. Það myndi auðvelda okkur mjög vinnuna ef fólk myndi skrá sig, annaðhvort á Facebook-síðu viðburðarins og/eða með því að senda tölvupóst á myndumborg@gmail.com. Gott er að tiltaka nafn, símanúmer og hvort menn geti komið á bíl eða hjóli.

Þetta er einstakur viðburður sem EKKI verður endurtekinn en öruggt má telja að ljósmyndin og myndbandið sem verður til, eigi eftir að vera notað lengi í umræðunni um borgar- og umhverfismál á Íslandi. Það er því um að gera að taka laugardaginn 19. júní frá!